Endurmat fasteigna
Um þessar mundir huga mörg fyrirtæki og fasteignaeigendur eðlilega að því að endurmeta virði fasteigna sinna. Þær hafa verið færðar á kostnaðarverði hjá mörgum félögum og afskrifaðar frá byggingu eða kaupdegi. Það er umtalsverð hækkun erlendra lána og þörfin fyrir auknar tryggingar að baki þeim sem knýr menn nú til umhugsunar um þessi mál. Mörg félög standa vafalaust vel að vígi í þessu sambandi og hafa svigrúm til að færa eignir nær markaðsvirði. Aðrir hafa ekki eins mikið borð fyrir báru hvað þetta varðar.
Heimildir eru í ársreikningalögum til þess að endurmeta fastafjármuni. Mismunandi reglur gilda þó um endurmat eftir því hvort um er að ræða eignir sem skilgreindar eru sem fjárfestingareignir eða ekki. Fjárfestingareignir skal leitast við að færa á gangvirði (söluvirði) ef mögulegt.
Fjárfestingareignir eru skilgreindar skv. alþjóðlegum reikningsskilastöðlum (IFRS) sem eignir sem ætlaðar eru til öflunar leigutekna en eru ekki til notkunar í eigin rekstri. Þess bera að geta að land sem ekki hefur verið ákveðið hvernig á að nota í framtíðinni er einnig skilgreint sem fjárfestingareign í þessum sömu stöðlum.
Besta mat á gangvirði eigna byggir á þekktu viðskiptaverði á virkum fasteignamarkaði þar sem verðmyndun ræðst m.a. af staðsetningu eignar, ástandi hennar og þeim samningum sem um hana gilda, svo sem leigusamningum. Fasteignamarkaður á Íslandi í dag er botn frosinn og því ekki um neina eðlilega verðmyndun að ræða. Í slíkum tilfellum eru ákvæði í stöðlunum sem leiðbeina mönnum varðandi mat eigna.
Þó fasteignamarkaður sé óvirkur um þessar mundir eru viðurkenndar alþjóðlegar aðferðir til að meta gangvirði eigna byggt á leigusamningum og fleiri atriðum. Fyrirtækjasvið KPMG hefur byggt um mikla sérfræðiþekkingu á þessu sviði og leggur m.a. áherslu á í sinni vinnu að endurmat nýtist fasteignaeigendum við endurskipulagningu fjármála sinna og þeirra samskipta sem af því leiða.
Nánari upplýsingar veitir Ólafur Örn Ólafsson
